ਆਸਟ੍ਰੇਲੀਆ ਦੀ ਸਿੱਖ ਸੰਗਤ ਵਲੋਂ ਨਵਾਂ ਆਰ.ਐੱਸ.ਐੱਸ ਕੈਲੰਡਰ ਰੱਦ
ਸਰਬ ਪ੍ਰਵਾਨਿਤ ਪੁਰਾਣਾ ਨਾਨਕਸ਼ਾਹੀ ਕੈਲੰਡਰ ਹੀ ਮੰਨਿਆ ਜਾਵੇਗਾ
ਮੈਲਬੌਰਨ: 6 ਜਨਵਰੀ 2010
3 ਜਨਵਰੀ ਦਿਨ ਐਤਵਾਰ ਨੂੰ ਸ੍ਰੋਮਣੀ ਗੁਰੂਦੁਆਰਾ ਪ੍ਰਬੰਧਕ ਕਮੇਟੀ ਦੀ ਕਾਰਜਕਾਰੀ ਕਮੇਟੀ ਨੇ ਆਰ.ਐੱਸ.ਐੱਸ, ਸੰਤ ਸਮਾਜ ਅਤੇ ਬਾਦਲ ਦੀ ਸ਼ਹਿ ‘ਤੇ ਸਰਬ ਪ੍ਰਵਾਨਿਤ ਨਾਨਕਸ਼ਾਹੀ ਕੈਲੰਡਰ ਵਿੱਚ ਫੇਰ ਬਦਲ ਕਰਕੇ ਸਿੱਖ ਕੌਮ ਨਾਲ ਗੱਦਾਰੀ ਸਿੱਧ ਕਰ ਦਿੱਤੀ ਹੈ ਅਤੇ ਇੱਕ ਹੋਰ ਦਿਨ ਸਿੱਖ ਕੌਮ ਦੇ ਇਤਿਹਾਸ ਵਿੱਚ ਕਾਲੇ ਦਿਨ ਵਜੋਂ ਲਿਖਿਆ ਗਿਆ ਹੈ।ਸਿੱਖ ਕੌਮ ਇਸ ਅਤਿ ਮੰਦਭਾਗੇ ਕੰਮ ਅਤੇ ਨਵੇਂ ਬਣੇ ਕੈਲੰਡਰ ਨੂੰ ਕਿਸੇ ਵੀ ਪੱਖ ਤੋਂ ਸਵੀਕਾਰ ਨਹੀਂ ਕਰੇਗੀ। ਖਾਸ ਕਰਕੇ ਬਾਹਰ ਵੱਸਦੇ ਜਾਗਰੂਕ ਸਿੱਖ ਇਸ ਮਿਲ ਗੋਭੇ ਵਾਲੇ ਮੱਕੜ-ਧੁੰਮਾ ਕੈਲੰਡਰ ਨੂੰ ਕਦੇ ਵੀ ਪ੍ਰਵਾਨ ਨਹੀਂ ਕਰਨਗੇ ਅਤੇ ਸਾਰੇ ਦਿਹਾੜੇ ਪੁਰਾਣੇ ਕੈਲੰਡਰ ਮੁਤਾਬਿਕ ਹੀ ਮਨਾਉਣਗੇ। ਇਨ੍ਹਾਂ ਗੱਲਾਂ ਦਾ ਪ੍ਰਗਟਾਵਾ ਕਰਦਿਆਂ ਸਿੱਖ ਫੈਡਰੇਸ਼ਨ ਆਫ ਆਸਟ੍ਰੇਲੀਆ ਮੈਲਬੌਰਨ ਦੇ ਪ੍ਰਧਾਨ ਸ: ਜਸਪ੍ਰੀਤ ਸਿੰਘ, ਸਕੱਤਰ ਸ: ਹਰਕੀਰਤ ਸਿੰਘ ਅਜਨੋਹਾ, ਖਜਾਨਚੀ ਸ: ਸੁਖਰਾਜ ਸਿੰਘ ਸੰਧੂ, ਸ: ਮਨਦੀਪ ਸਿੰਘ, ਸ੍ਰ੍ਰੀ ਗੁਰੂ ਸਿੰਘ ਸਭਾ ਕਰੇਗੀ ਬਰਨ ਤੋਂ ਪ੍ਰਧਾਨ ਸ: ਫੁਲਵਿੰਦਰ ਸਿੰਘ ਗਰੇਵਾਲ, ਸਕੱਤਰ ਸ: ਸਤਨਾਮ ਸਿੰਘ ਪਾਬਲਾ, ਗੁਰੂਦੁਆਰਾ ਸਾਹਿਬ ਰਿਵਸਬੀ ਤੋਂ ਸ: ਜਤਿੰਦਰ ਸਿੰਘ ਮੂਣਕ, ਸਾਊਥ ਆਸਟ੍ਰੇਲੀਆ ਤੋਂ ਸ: ਅਜੀਤ ਸਿੰਘ, ਸ: ਰੁਪਿੰਦਰ ਸਿੰਘ, ਸਿਡਨੀ ਤੋਂ ਸ: ਮਨਜੀਤ ਸਿੰਘ ਪੁਰੇਵਾਲ, ਸ: ਜਸਪਾਲ ਸਿੰਘ, ਸ: ਕਮਲਜੀਤ ਸਿੰਘ ਜੰਡੀ, ਸ: ਤਰਲੋਕ ਸਿੰਘ, ਪਰਥ ਤੋਂ ਸ: ਅਮਨਦੀਪ ਸਿੰਘ, ਸ: ਦਲਵਿੰਦਰ ਸਿੰਘ ਆਦਿ ਨੇ ਕਿਹਾ ਕਿ ਮੱਕੜ ਜੁੰਡਲੀ ਨੇ ਇਹ ਫੈਸਲਾ ਕਰਕੇ ਪੰਥ ਦੇ ਦੁਸ਼ਮਣਾਂ ਵਿੱਚ ਆਪਣਾ ਨਾਂ ਪੱਕਾ ਕਰਵਾ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਫੈਸਲੇ ਨਾਲ ਇਸ ਜੁੰਡਲੀ ਨੇ ਆਰ.ਐੱਸ. ਐੱਸ ਦੀ ਸ਼ਹਿ ਤੇ ਪੰਥ ਨੂੰ ਦੋਫਾੜ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ਜੋ ਕਿ ਕਦੇ ਮਾਫ ਕਰਨ ਯੋਗ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਖਾਲਸੇ ਦੇ ਦਿਹਾੜੇ ਨਾਨਕਸ਼ਾਹੀ ਕੈਲੰਡਰ ਦੇ ਅਨੁਸਾਰ ਹੀ ਚਲੱਣਗੇ ਅਤੇ ਖਾਲਸੇ ਦਾ ਦਿਨ ਪੁਰਾਣੇ ਕੈਲੰਡਰ ਅਨੁਸਾਰ ਸ਼੍ਰੀ ਹਰਿਮੰਦਰ ਸਾਹਿਬ ਤੇ ਸੂਰਜ ਦੀਆਂ ਪਹਿਲੀਆਂ ਕਿਰਨਾਂ ਪੈਣ ਨਾਲ ਹੀ ਸ਼ੁਰੂ ਹੋਵੇਗਾ।ਉਨ੍ਹਾਂ ਕਿਹਾ ਕਿ ਨਾਨਕਸ਼ਾਹੀ ਕੈਲੰਡਰ ਸਿੱਖਾ ਦੀ ਵੱਖਰੀ ਪਹਿਚਾਣ ਦਾ ਪ੍ਰਤੀਕ ਹੈ ਪਰ ਇਹ ਗੱਲ ਹਿੰਦੂਵਾਦੀ ਸੰਗਠਨਾਂ ਨੂੰ ਨਹੀਂ ਭਾਉਂਦੀ, ਇਸ ਲਈ ਉਨ੍ਹਾਂ ਆਪਣਾ ਜੋਰ ਪਾ ਕੇ ਇਸ ਕੈਲੰਡਰ ਦੇ ਵਿੱਚ ਕੁਝ ਫੇਰ ਬਦਲ ਕਰਕੇ ਇਸ ਨੂੰ ਮੁੜ ਬਿਕ੍ਰਮੀ ਕੈਲੰਡਰ ਦੀ ਕਾਰਬਨ ਕਾਪੀ ਬਣਾ ਦਿੱਤਾ ਹੈ।ਨਾਨਕਸ਼ਾਹੀ ਕੈਲੰਡਰ ਸ: ਪਾਲ ਸਿੰਘ ਕਨੇਡੀਅਨ ਅਤੇ ਹੋਰ ਵਿਦਵਾਨਾਂ ਦੀ ਅਣਥੱਕ ਮਿਹਨਤ ਦਾ ਫਲ ਸੀ ਜਿਨ੍ਹਾ ਨੂੰ ਕਮੇਟੀ ਨੇ ਫੇਰ ਬਦਲ ਕਰਨ ਲੱਗਿਆਂ ਸੰਪਰਕ ਵੀ ਨਹੀਂ ਕੀਤਾ। ਉਨ੍ਹਾਂ ਸ: ਸੁਖਦੇਵ ਸਿੰਘ ਭੌਰ, ਬੀਬੀ ਰਵਿੰਦਰ ਕੌਰ ਅਤੇ ਸ: ਕਰਨੈਲ ਸਿੰਘ ਪੰਜੋਲੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨਾਨਕਸ਼ਾਹੀ ਕੈਲੰਡਰ ਦੇ ਹੱਕ ਵਿੱਚ ਵਾਕ ਆਊਟ ਕਰਕੇ ਆਪਣਾ ਫਰਜ਼ ਪੂਰਾ ਕੀਤਾ ਹੈ ਅਤੇ ਆਪਣਾ ਨਾਂ ਤੇ ਇਹ ਕਲੰਕ ਲਗਵਾਉਣ ਤੋਂ ਉਹ ਬਚ ਗਏ ਹਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਤਿੰਨ ਮੈਂਬਰਾਂ ਤੋਂ ਇਲਾਵਾ ਕੋਈ ਵੀ ਮੈਂਬਰ ਆਸਟ੍ਰੇਲੀਆ ਆਉਂਦਾ ਹੈ ਤਾਂ ਉਸ ਤੋਂ ਇਸ ਸੰਬੰਧੀ ਜਵਾਬ ਪੁੱਛਿਆ ਜਾਵੇਗਾ ਅਤੇ ਉਨ੍ਹਾਂ ਸਾਰੀ ਦੁਨੀਆਂ ‘ਚ ਵੱਸਦੇ ਸਿੱਖਾਂ ਨੂੰ ਅਪੀਲ ਕੀਤੀ ਕਿ ਉਹ ਵੀ ਭਵਿੱਖ ‘ਚ ਐਸ. ਜੀ. ਪੀ. ਸੀ. ਤੋ ਂ ਵਿਦੇਸ਼ਾਂ ਦਾ ਦੌਰਾ ਕਰਨ ਆਏ ਹਰ ਮੈਂਬਰ ਨੂੰ ਜਵਾਬ ਦੇਹ ਕਰਨ।